ASTRO PUNYA PASAL!

Tu cerita mantai ke pemedis ati. Udah 2 ari Astro ba rumah kami nadai. Nama kebuah? Ukai setegal enda bebayar, lebih bebayar bisi. Suba Papa ia subcribe 2 iti Astro, decoder siti engkah ba atas kena anak meda katun, decoder siti ba baruh kena indai meda Desprate Housewife. Anak asi Papa laban ka buyan enggai kediri meda katun malam ari ba atas laban semua urang tuai meda TV ba baruh. Udah nya aku ngasuh papa ia terminate aja Astro ba atas nya. Nadai guna, agi ga belaya enggau anak ba baruh berebut ka channel TV.

Lalu datai meh penusah, raya ga pemeli sida ka gawa ba Astro neh! Aku tu keja ba customer service meh, nemu aku keni kitai ngereja pengawa, nyalur ngagai jalai ke betul.

Nyadi termination decoder siti nya udah 3 bulan papa ia ngasuh ASTRO ngaga, enda nemu cerita engka udah meh nya. Tang bill tiap bulan agi ga mengkang datai, bayar papa ga. Enda liat majak mayar papa call ASTRO baru, nanya ke status termination. Enda ga CS (Customer Service) nya nemu enggau ia. Padah nyentuk ga lumur kad 1 enggau kad kedua nya siti-siti awak ka sida nemu ni bagi.

Sekali pagi kemari on TV ba baruh nyau nadai service agi. Parai kitai! Lain utai di asoh terminate lain ga utai di terminate. Ni enda ngasuh ati pedis. Telefon baru nanya nama kebuah terminate ke existing decoder nya enda ga sida nemu nama kabuah. Check ba technician sida nemu kita nama reply sida. Enda ulih maca message ke di sampai customer! Apu! Raya pemeli-meli. Cukup simple utai nya. Terminate kad 1, kad ke 2 nya agi dikena. Udah ga lumur kad nya dibaca. Udah nya Papa ga di anu sida. Apahal?! Tadi sida madah nguji resolve problem nya try on tv baru pagila.

Enda ngawa sida ia. Pagila enti enda ulih, pegila sida ensepi. Aku enggai di main-main sida. RM 300 bebayar kusung. Ia ka ba atas nya sigi lama enda ulih dipeda. Kitai ka mayar service sida, kitai ka dianu sida. Papa lembut ati, bejako manah-manah. Aku enggai di kembeli ka CS nya. Laban aku ngasai aku kala keja baka sida nya enda aku kala nganu customer. Nyema ringat ke customer jai udah ngeletak tel ga aku nyumpah sida. All call recorded, kumbai sida enda nemu aku. Nya nyadi appraisal sida kena ngulih bonus. Sigi perak aku sida pegila. Tanya ke nama penuh CS nya ngambi nyamai ngaga complain. Utai simple bakanya pen enda nemu ngaga solution. Nampak amai nadai kaul manah Dept CS enggau Dept technician sida.

Enti nunda nadai masalah nya ulih drag sampai 3 bulan. Enti dek enda bebeli madah ke Technician nama penyalah sebenar. Sigi ka tetuyu sida ke gawa ba ASTRO tu deh. Bedau customer complain bedau sida lengkas ngadu ka masalah tu. Engka rindu ninga customer reraouh ba tel kini?

Pedis amai ati aku. Minta ampun bala maioh, sigi sengaja nulis ditu kena mantai ke pemedis ati.

Kakak & Adik

Kakak enggau adik begambar begulai. "Nemu Aqila megai adik , kuat Aqila pegang" ko kakak.

Nama lauk kita?

Tu meh tanya aku selalu lebuh indai ka selalu talipaun maia jam pukul 7.30 - 8.00 malam. Rajin urang tuai nya telipun diatu laban gagit ka nemu cerita uchu mit ia (Aqif). Malam tadi ia talipun baka biasa tu randau kami seduai indai:

Aku: Nama gaga kita saritu?

Indai: Manchit umai kami duai apai dek tadi. Manah ari saritu.

Aku: Nama lauk kita tadi?

Indai: Nya meh apai dek belauk ka 'nyumboh ngandung'. Ia enda nemu nyumboh nya ngandung ulih Rudy kemari.

Aku: Apu... geli aku ninga lauk apai nya. Amai bam apai tuai nya nadai enda utai ka enggai. Kati kita nemu nymboh nya ngandung deh?

Indai: Rudy empu nusi. Anak nyumboh nya di ais ia (tepu dalam peti ais) ka kena ia nginti lelabi.

Aku : Dalam ati....( kejam amai kitai Iban. Kasih amai jelu nya. Ia ga tudah ngandung, dibunuh. Anak ia bedau pansut pan udah nyadi mangsa ka umpan ginti lelabi. Nya amai enda nemu lembau nyawa.

Becerita pasal lauk apai kami sigi rindu makai exotic food deh. Kekadang kitai ka irau ka pengerai ia. Nyadi apai kami sakit 'glamor' ko urang baka darah tinggi, kencing manis etc enda enggau urang tang ia bisi pemedis batu karang. Nyadi ko lutor penyakit ia tu asal ari utai pakai ia. Ni enda nadai enda jelu babas ke enggai urang tuai tu. Sawa aja enda laban ka mali ko kenu.

Becerita pasal jelu ke lauk ba rumah panjai kami nembiak nama Rudy tu sigi tegar ngiga jelu babas. Ia tu meh pembunuh jelu lumor satu. Nadai ati sinu mensia tu. Tu dialog seduai niang aki aku ba kaki lima rumah panjai suba ka agi di kingat aku.

Niang aki: Bulih dek ngasu tadi Udy?

Rudy: Bulih aki. Ni enda bulih . Indai nyumboh benung nyandik anak ia di timbak aku. Dulu anak ia labuh aki nya baru indai ia. Aram aki enggau kami makai tunu nyumboh. Din ngintu ia tadi ba langkau ampun.

Bedau agi cerita ia bulih payau sekayu bilik benung nyengkubang sawah umai. Kasih meda jelu kekadang tang apa bulih buat, munyi ko apai ari nya meh bansa kitai Iban bulih Protein. Enti ngumbai meli daging serta manuk sebelah pasar enda maioh deh bala ba rumah panjai mampu. Sekali sekala ulih la enti nyau tetiap ari baka urang pemesi ngalu ka supermarket meli lauk dini tudah ulih.

Bah nya aja meh cerita lauk saritu.

Nyawa Enda Nemu Lembau

Nadai nemu lembau nyawa aku tu makai. Kenu ko bulan puasa tu aku ka diet ngambi ka kurus. Nyau ngasoh aku gemuk agi. Enti lebuh angkat makai sahur pukul 5 pagi bedunjung meh asi empa aku. Dini enda Papa Aqila enda ngiling ka pala. Lebuh maia bebuka raya agi baka ka nurun shopping aku meli utai ba bazaar ramadhan. Akai dai.

Ia ka ngasoh aku jeles amai meda Papa Aqila jauh amai insur ia sekumbang bulan puasa tu. Berat ia sebesau puasa 94kg diatu udah nurun ngagai 89kg. Nya neh 6kg nurun. Bendar ia nagang diri makai. Enti sahur makai mimit, maia bebuka makai kuih aja. Apu.. enda aku nakal napat ia baka nya.

Nya bisi bala kaban beblog tu ngaga business nyual ubat slim kini. Tau ngambi aku nyadi testimonial. Ngambi gambar sebelum enggau selepas. Ha..ha... Enggai ke bala maioh enda nemu pemerat aku diatu 65kg. Berat sebedau ngandung 54kg. Parai bakatu.

Randau sebilik.

Randau kitai seari-ari kekadang ngasuh ati geli. Kelebih agi enggi tudah Aqila laban ka baru nemu bejako.

1. Randau Aqila seduai menyadi aku, Enot.

Enot: Ia (Aqila), nama utai beli seduai mama dek tadi?

(Aqila faham jako iban tang selalu nyaut ngena jako melayu)

Aqila: Tak beli ape. Teman mama beli kurman jer.

Enot: Beli kurman???

Ari siti papa ia pulai ari kerja lalu nyua ke Aqila plastik. Ia lalu belawa ngagai aku ngemai plastik nya.

Aqila: Mama, papa bawa balik kurman.

Mama Doyee: Eii... buah kurma paduhal ko anak tuk.

Enot: Kah! Kah! Kah!

2. Randau Enot seduai ama aku Sari.

Enot: Sari, bunyi apa tu?

Sari: Bunyi apa kak?

Enot: Bunyi macam kucing tecekik tulang ikan. Mati kucing tu nanti Sari.

Mama Doyee; Nama nya?

Enot: Ga ia munyi maiau engkelan tulang. Parai maiau nya legi. Raya amai munyi ia nya. Nyau sesikuk.

(Nyau ga tudah Sari nyengok ke luar dapur)

Sari: Bukan kak, bunyi machine basuh jiran sebelah.

Mama Doyee: Apu... overload machine basu urang nya. Pemadu.

Enot & Sari: Kah ! Kah! Kah!

SUPERHERO KELIA

Nyadi cerita tu nyadi ukai dalam taun 2000 tang back to 50's, 60's kelia. Cerita tu di tusoi ke indai aku ngagai aku maia umur aku dalam 17 taun ianya lebih kurang 12 taun ti udah. Tang semua cerita indai tu mengkang ba dalam runding aku (memory) laban cerita ia tu ngasuh ati aku alit serta suah nanya diri empu. Amai enda ke cerita tu? Sama-sama kita berati ke cerita tu.

Cerita tu nyadi ba rumah panjai sida indai (menoa enda tau disebut). Hero dalam cerita tu di tusi ke indai aku nama ia Apai Atong tang aku enda nemu nama amai ia. Apai tuai tu sigi endur sida serumah berubat enti lebuh maia tabin tauka sakit raya. Nyadi ilmu beliau ia ko sida amat tinggi laban kala belajar ilmu tu ba Kalimantan Indonesia.

Cerita ka ditusoi aku semua cerita ajih ka udah di gaga apai tuai tu. Bisi nya peda mata pala indai aku empu, bisi nya ari tusoi urang.

1. Apai Atong kala ngiru anak mit umur 5 taun indu ba rumah panjai bukai ba ulu Baram kelia. Kitai bela nemu anak mesai nya sigi udah ngelala apai indai sigi tetap enggai di bai urang ke enda di kelala ia. Maia Apai Atong datai malam ba rumah nya anak mit nya sigi enggai ngelali sida ke datai. Takut meh tudah. Pagi tungkah sida ka nurun anak mit indu nya agi ga nyabak. Tali perau udah ga di buka, dia Apai Atong lalu mantai ka kerupok ari beg ia, dipuchau ka ia kerupok lalu disua ka anak mit nya. Nama deh udah anak mit nya makai kerupok nya ia lalu minta berap Apai Atong lalu minta ka enggau. Sampai tuai anak mit nya di iru ia.

2. Ba rumah panjai sida indai tu bisi siko bujang sigat (sigat ko sida kelia meh nya). Bujang tu kering sereta berani. Enti ketanah enda kala enda pulai mai jelu. Tang siti ulah ia enda manah, ia bejako sumbong. Ba rumah panjai sida indai bisi siko ga dara tang indu tu bisi timpang tuboh. Ia mit tusu sepiak. Bala bujang bukai sigi rindu beduan bujang sigat tu enggau indu ka nadai tusu sepiak tu tadi. Dia bujang nya selalu ringat ninga jako tundi sida. "Parai enda meh aku jadi enggau indu nya!" ko ia nyaut pedis ati.

Maia ia ke munyi nya Apai Atong bisi ninga. Indu nya ukai urang bukai ga bala ia empu. Nemu kita, malam nya udah bujang sigat tu munyi nya ia lalu nama ke diri ngagai indu nya! Minta ka jadi enggau indu tu. Sampai diatu agi jadi beranak berucu (Aku ngelala aki tuai tu).

3. Kelia sigi maioh urang datai. Sida tu di kumbai 'kampar'. Laban iban ka amai bejalai (merantau) sebelah rumah panjai bukai suba. Bisi siko lelaki kampar tu datai ngagai rumah panjai sida indai. Nama ia Empangup. Empangup tu sigi tuyu enda betul. Setengah tiang meh nya ko kitai.

Nyadi Empangup tu diau ba sida Indai. Maia nya musim urang ngetau. Kelia pama gawa tanah sigi sampal sekayu bilik nurun ke tanah deh. Munyi ko indai kebuah pia laban maia ngetau lauk nyamai, makai di tanah nyamai. Kelia ukai bisi TV deh wai, nadai kerja bukai, ka ke pasar jauh ga, duit ukai bisi deh. Nyamai agi ga sampal ketanah mai bala anak. Nyentuk ke agi mit pan di bai. Nya sida uyut tekating sebelah dan kayu.

Nyadi Empangup tu ukai semina tuyu tang panjai jari. Maia urang abis turun ke umai ia lalu mulai kediri kerumah lalu enchuri duit ibu kami. Penyampau duit ke di churi ia nya dalam RM 50. Kelia amai berega duit nyampau tu. Nama deh pulai sida ibu turun ia lalu meresa serangan ti selalu endur ia nyimpan duit ia. Peda lenyau duit ia.

Enda puas ati tudah ibu ia lalu mai ini kami ngereput ngagai Apai Atong. Dia Apai Atong lalu nilik ngena penemu ia sapa ti enchuri duit ibu. " Nya temu sapa urang ke ngambi duit tu. Legi aku ngadu ka ia" ko Apai Atong.

Nama deh ari siti baka selama urang nurun turun baru. Benung urang ngetu tengah ari peda sida Empangup belawa-lawa ngagai langkau sida. Nyau mirah mulut Empangup balut darah. "Lapa ngeli dek Empangup?" Ko sida nanya. Nya meh ari tadi tu bedarah ko ia. Pedis meh ia ngetat ke ngeli ia nya.

" Bisi salah pengawa dek tu. Anang dek enda ngaku penyalah dek Empangup enggai ke dek parai!" ko bala

Dia Empangup lalu ngako meh ia udah enchuri duit ibu kami. Nasit duit 50 nya bedau dikena ia lalu di pulai ka ia baru ngagai ibu kami nya. Nama deh enda lama udah nya lalu badu meh ngeli Empangup bedarah.

Ko Apai Atong " Laban Empangup ke enchuri duit dek, enti urang bukai enda aku ngaga ia bakanya"

4. Parai sida indai serumah. Nyadi niang aki kami enggau apai Atong enggau urang numbak bangkai. Pendam tu enda jauh ari jalai alun deh. Datai cina mai santubong ba pendam. Maia nya pengawa sigi udah tembu. Nyadi cina nya madah ia ngagai rumah panjai sida indai baru ngalih ke lemai legi. Tang ia ka pulai ke pasar dulu.

"Nya, am sanu" ko Apai Atong nganu aki. "Ke pasar tua". "Keni ka ke pasar nadai mai duit sepusen tu. "Ko tudah aki. "Aku nadai meh. Enda ngawa bejalai aja tua"Ko Apai Atong ga. Ka ga aki di bai ia. Raun kusung meh nya. "Apu berentak ngining utai sebelah pasar tu legi" ko aki. Apai Atong tuchum aja.

Datai seduai di pasar apai Atong lalu mai aki tama kedai kupi. "Eh nama kena tua bebayar legi?" Ko aki. "Legi dek meda" ko Apai Atong ga. Nama deh duduk meh seduai lalu ngudar ai irup. Udah tembu ngirup dia aki meda Apai Atong nempap kuchik tanchut ia 3 kali. Peda aki pansut duit not RM 10 ari tanchut ia. Nama deh nya meh kena ia bebayar.

Aki amai iran ati, kati ia tau bulih duit nyampau nya. Seduai sigi tuboh puang ari rumah, gari pan ngena gari kamah laban ke nulong urang numbak bangkai. Dini ia bulih duit nya kini. Nyau teringat aku cerita David Blaine. Ko aku sigi sihir kena David Blaine nya. Aku kala meda siri ia ngusak gelas peminta sedekah ka penuh ai teh nyadi duit syiling. Amai bisi penemu tu.

5. Cerita last tu sigi cerita takut. Ini sida indai raya amai sakit. Di asoh sida aki ubat Apai Atong. Nya ko Apai Atong, 'Enti kita agi belala begulai enggau ia aku ulih nampung seput Sanu" ko ia. Nama deh laban ke selalu sayau ke tudah indai ia dia aki lalu setuju meh.

Nama deh diadu ke Apai Atong meh tudah ini. Ia lalu enda nyadi parai. TANG... bisi penyelai ia. Enti nunda ini tuai kami tu sigi lama udah nadai tang laban ke ditampung seput ia agi idup. Maia malam ko indai kukut ini kami tu nemu nambah panjai, pia mega bok ia. Neh nyadi antu meh nya.

Bisi siti malam aki kami meda ini tetiba duduk. Kukut ia ke panjai ngerawis tikai, bok ia kapa pia dek nyau ngerembai enda temu tuku. Peda aki mata ia segala besai mirah. Alu di tegah aki ini. "Nama gaga dek indai!" ko aki. Niang ini tuai kami tu lalu tekenyit udah nya ia lalu ngali kediri. Aki lalu berunding "enda alah ngibun indai tu. Salah pengawa tu." ko ia. Lalu di asoh sida adu ke Apai Atong baru tudah ini, nama deh parai meh ia udah nya.

Ko sida indai seput ini di tampung ia ngena seput ukoi. Parai kitai.

Nya keni runding kita bala maioh? Pecaya kita ke cerita tu tau nyadi? Sama-sama meh kitai berunding.

Matah ka Lidi

Kala kita ninga urang nyebut 'Matah ka lidi'? Ti urang enda kala ninga utai ka disebut tu nadai nyalah-nyalah meh ayat tu. Nyadi lemai kemari maia aku ninga radio Iban Waifm aku bisi tedinga ka siko penyanyi lelaki belagu ngena judul lagu Matah ka lidi. Nya aku teringat ke cerita Apai aku maia ia ngajar ba siti menoa tu. ( Endur enda tau disebut wai. Laban tu cerita sensitif)

Ketu ko cerita ia...

Apai enggau indai sigi nemu rita siko indu dara ba menoa endur seduai ngajar tu raya sakit. Kenu ko sida indu tu kena sakit kanser susu. Bisi seduai datai ke rumah panjai ngabas indu ka sakit tu.

Lemai ari siti datai urang ari rumah panjai indu tu bepadah ke sebelah rumah sekula ngasoh ke rumah panjai sida laban deka 'Matah ka Lidi' si A tu. (A nama samaran ia.) Nyadi apai aku sigi enda jugau deh enti bisi urang rumah panjai bepadah lebuh bisi penusah ia sigi ngusong. Nyadi ba penemu ia Si A tu sigi udah nadai lalu Matah ka Lidi nya reti ia nyenggai ia.

Lebuh maia apai datai ba rumah sida A tu urang sigi udah mayoh. Santubong ia pan udah di beban urang. "Udah nadai meh A tu" kenu ko Apai. Baka selama meh kitai enti ngesah urang nadai alu nudok ka diri ba ruai. Maia Apai ka datai nya ari sigi udah malam. Urang pan udah belaboh besadung ka pemakai kena ngintu diri makai malam.

Apai belaboh iran ati laban nadai meda bangkai gegaring ba ruai. "Bah, ko ia. "Ni bangkai enda dikatung ka ruai deh?" ko ia dalam ati. Laban urang ke bepadah lemai ari, ia ke ngesah penusah nyau malam. Enti nunda ka sigi udah bangkai di katung ke ruai.

Enda lama Apai udah tembu makai dia ia dikangau ka Aya si A tu tadi. "Aram Cikgu, enggau meda urang Matah ka Lidi A" Ko ia. Apai aku bebengap. "Nama meh reti Matah ke lidi sida tu?" ko ia ga dalam ati.

Nama deh angkat meh tudah Apai nitih ke Aya A tu ngagai bilik sida A. Peda ia urang sigi maioh nyau tusut sebelah bilik. Ia ke meda sebelah empelua nunga ke ruai kenya meh. Nyau bepaut-paut sida ka meda. Apai aku alu berasai enda nyamai ati.

Maia ia tama ke bilik sida A dia apai aku berasai amai tekenyit ati! Nemu kita bedau parai Si A tu tadi tang munyi ko utai ia ga raya sakit agi jejengap meh tudah. "Apu... salah amai pengawa tu." ko Apai bejako kediri.

"Apai Sanu, maioh amai urang, enda aku enggau tama deh , nyamai nganti ba ruai deh" ko Apai. Nasit ko ia Aya A enda mansal ia enggau meda.

Nemu kita keni sida Matah ke lidi? Ko aku munoh mensia meh nya.

Semua sida kaban belayan ngelingi penindok indu tu alu siko ari Aya sida megai bantal. Nyadi sekumbang ia ke sakit sigi ba bilik besai meh urang ngali ke ia. Ta ditekup ka Aya ia meh moa indu tu enggau bantal! Apai laban ka sigi urang siru enggai meda. Tambah mega ia sigi urang penakut serta takut ke ulah sida A serumah tu.

Nyau Apai mai 'Apai Sekula' sida ia mulai ke diri. "Pulai tua Sanu. Salah pengawa sida serumah tu. Tua kerja perintah, enti bisi urang betusi aku enggai nyadi saksi, tua pan tau di buai kerja. Tua tu nyau enggau urang bebunuh ke mensia ukai nyenggai mensia" ko Apai. Nyau meh seduai mulai ke diri.

Nyadi kenu ke jerita sida ke meda, sigi kasih meda tudah A. Maia sida ke mejal ia enggau bantal ngelingkang meh tudah tuai. Ia ga agi kering serta agi ngeleda deh tudah tuai. Lama ko sida bisi seminit endur ia apus seput. Enda kasih kita ninga jerita tu?

Amai 'scary' wai. Nyadi tudah Apai enda nemu reti nadai meh ia nemu reti 'Matah ka Lidi' tu. Dikumbai ia sigi ngesah urang nadai meh. Nya ko Apai enti bisi urang bepadah nyebut 'Matah ke lidi' agi ia sigi enggai enggau ko ia. Sinu ngenang urang ka sakit raya di gaga bakanya.

Nyadi ko sida A serumah, A tu udah lama sakit raya. Ukai ta sebulan dua nyau ka manggai betaun. Kitai bela nemu meh sakit kanser tu. Tambah enggau ia sigi enda berubat. Udah berapa kali ia dikemegau ka sida serumah kumbai udah nadai agi ga seput ia bisi. Nya meh nyau pemuas ia dipejal (bunuh) sida sekali. Tang urang ke ngereja ka ia nya sigi sida sebilik empu ukai urang bukai.

Apu... ko aku. Parai kitai wai. Nama penyadi enti kitai ba situasi tu. Sigi takut aku. Kasih amai tudah indu nya. Sampai ati Apai Indai ia meda ia di gaga bakanya. Sigi lelak, buntau, pedis meh ngembuan urang sakit, tang anang sampai ngaga ia bakanya. Indah enti urang sakit enda tau makai ngirup kitai udah sinu meda. Enda nemu meh kitai penemu setiap mensia sigi enda sama.