Mensia Maioh.

Kala kitai meda ulah mensia maioh nyelai sereta ngasoh kitai berunding. Pemuas ka nadai pengawa aku lalu tefikir ka ulah mensia. Uji kitai meda sereta sama berunding.

1. Bisi urang burok peda kitai. Enggai ngemas rumah, malas berapi, malas ngintu diri TANG enda kala malas nurun gawa. Reti nya mina malas ba ia empu aja, laban tedesak ia rajin nurun kereja. Maia gawa kereja ia baka urang bukai, enda tinggal, ulih ngaga nama utai di gaga urang.

Tebalit ga, bisi urang rajin ngintu diri, bajik gamal, wangi belama. Rumah kemas, utai teratur TANG, selalu ngaga MC kediri maia kerja. Lembau nurun, maioh alasan ngaga pengawa.

2. Bisi urang rajin merus ngeli, udah makai di berus ia ngeli. Kini2 di bai ia berus enggau ubat ngeli, TANG tuboh ia bau tengong! Kati ko nya?

3. Bisi urang pandai. Belajar pandai, untak cergas TANG ia milih jalai salah. (Baka kes Sufiah. ) Kitai berunding, enti ia beli, ia paloi urang enda nyebut ia. Pandak runding ko urang. Bah! Kati ko kes Sufiah nya deh? Enda patut runding ia pandak, tentu2 untak ia nemu berunding, akal ia bisi. Pintar gi ari urang bukai. Uji tanya urang ka enda school, nadai pemandai nadai siko ka milih jalai idup baka enggi ia nya enti di asoh milih. Kati ko nya?

4. Tu peda mata aku empu. Mensia tu amat ngenyadi, gari kena gawa beli sebelah pasar malam. Baju dalam kitai indu pen sebelah pasar malam meli. Makai ngenyadi TANG, ia sanggup meli kertas kena nyelap nyemari rega RM 90 segulung! Dalam segulung bisi 6 keping aja. Enti nyemari besai enda cukup segulung kena nyelap ia. Berunding meh kitai. Ko ia kertas nya wangi tan setaun. Kati ko nya deh? Nya aja utai mar sanggup di beli ia! Untong ia ba runding kita?

5. Tu ba urang lelaki ka nyadi tukang masak. Laki petunggal aku, gawa Offshore ba tasik. Kerja nyadi 'Cook' ko kitai. Tukang masak ba kapal meh nya. International compy, nemu meh kitai mandok pemakai Western sigi nemu meh urang. TANG, pulai ke rumah enda kala berapi! Enda kala umur idup aku makai utai di pandok ia! 3 Taun ti udah, enda nemu nama angin ia ngaga ka Indai aku Short Bread, nangka penyamai2. Kasih indai aku wai kemaia kala makai utai nyamai baka nya. Nyau letup2 nyawa ia nusi ka urang sebelah rumah panjai madah ka utai pandok 'Igat' ia nyamai? Kati ko nya deh?

6. Dr wai, ukai jauh tampong aku tu meh rumah ia. Kitai ka parai nyaga anak. Ujan kangau pulai, makai enti ulih utai ka berkhasiat meh. Enggi Dr tu anak mapar sebelah nya, moa anak pera-pera (baka aku kelia meh, kendas insak malit kuyu nyau chelum meh kuyu nya) baka nya meh pendiau anak ia. Rumah nibuh sebut penoh laban likau tulis anak ia. Seduai laki bini bela nyadi Dr. Engka nya betul kini cara ngibun anak. Enda meh kitai nemu. Bisi urang madah enti anak teleba kamah imune ia ari penyakit. Amat kini wai, jarang amai sakit asai aku sampai diatu. Enti Aqila aku nya taun 2006 suba 2 kali tama sepital. Sekali cirit (beresi ga asai ia) sekali angat. Udah ibun Indon keru urang raya sakit. Lapa meh ke beinsak mimit, tabin mimit nemu enda anak mit. Kati ko nya deh?

Aram kitai bela berunding. Pelaba aku bela bisi kitai nemu ulah mensia. Pelik meh nya. Anang ngambi ati bala maioh nyema bisi asai tekena mimit ba kitai. Semina mai ngenong aja. Setiap mensia sigi bisi ulah serta perangai pelik ia. Kitai meda enggi urang, urang meda enggi kitai. Enda pia?

Pengawa Maia Lepa

Nadai pengawa ujong minggu aku di bai kawan ngagai 'salon' ko niang ini ngaga pedicure & manicure. Gambar jari enda di ambi laban nangi ka Papa Aqila meda. Puas ngelalai ka cat kukut jari kaki nya. Enda nemu nama kabuah ngandung sekali tu ka amai aku tu nganta. Nyau ka tiap minggu aku nuchi bok ka salon. Nasit salon semak rumah aku tu mudah, enti mai syampoo ka diri empu ka RM20 aja charges ia. Ia ga bisi urut service nangka penyamai-nyamai di urut 'amoi' salon nya. Anang jealous kita bala kaban ka sama diau ba menoa KL tu ninga charges nya.

Tambah 'amoi' salon nyau teleba aku. Suba range ia ngecas aku dalam RM 35 - RM 40 untuk wash & blow diatu mudah jauh. 'Ukai nama ia nemu dek selalu kia" ko bala kaban ga.

Sorry ngagai bala kita ke bisi ngabas blog aku tang aku nadai ari malas comment kita. Diatu Mama Doyee udah bulih early Birthday present ari Papa dibeli ka urang lap top tudah aku. Tumeh kena aku bereksperiment ngaga blog. Ila aku ngadu ka blog tu badas agi enti bisi ari.

Bisi sida kaban ka baru ngabas, udah di update aku ba list bala kaban kita ka empu blog. Baka Pat aku sigi selalu ngabas blog ia deh. Rindu ninga cerita ia. Terima kasih laban rindu ngelawa ruai aku.

Udah tu selalu meh aku bisi masa ngabas blog aku. Maioh meh new up date udah tu termasuk gambar. Kati baka Puteri, bisi insur mimit ruai aku peda nuan? Ila nguji 'ngerini tek' ia munyi ko kami menoa. Mupok dulu.