Kala kita ninga urang nyebut 'Matah ka lidi'? Ti urang enda kala ninga utai ka disebut tu nadai nyalah-nyalah meh ayat tu. Nyadi lemai kemari maia aku ninga radio Iban Waifm aku bisi tedinga ka siko penyanyi lelaki belagu ngena judul lagu Matah ka lidi. Nya aku teringat ke cerita Apai aku maia ia ngajar ba siti menoa tu. ( Endur enda tau disebut wai. Laban tu cerita sensitif)
Ketu ko cerita ia...
Apai enggau indai sigi nemu rita siko indu dara ba menoa endur seduai ngajar tu raya sakit. Kenu ko sida indu tu kena sakit kanser susu. Bisi seduai datai ke rumah panjai ngabas indu ka sakit tu.
Lemai ari siti datai urang ari rumah panjai indu tu bepadah ke sebelah rumah sekula ngasoh ke rumah panjai sida laban deka 'Matah ka Lidi' si A tu. (A nama samaran ia.) Nyadi apai aku sigi enda jugau deh enti bisi urang rumah panjai bepadah lebuh bisi penusah ia sigi ngusong. Nyadi ba penemu ia Si A tu sigi udah nadai lalu Matah ka Lidi nya reti ia nyenggai ia.
Lebuh maia apai datai ba rumah sida A tu urang sigi udah mayoh. Santubong ia pan udah di beban urang. "Udah nadai meh A tu" kenu ko Apai. Baka selama meh kitai enti ngesah urang nadai alu nudok ka diri ba ruai. Maia Apai ka datai nya ari sigi udah malam. Urang pan udah belaboh besadung ka pemakai kena ngintu diri makai malam.
Apai belaboh iran ati laban nadai meda bangkai gegaring ba ruai. "Bah, ko ia. "Ni bangkai enda dikatung ka ruai deh?" ko ia dalam ati. Laban urang ke bepadah lemai ari, ia ke ngesah penusah nyau malam. Enti nunda ka sigi udah bangkai di katung ke ruai.
Enda lama Apai udah tembu makai dia ia dikangau ka Aya si A tu tadi. "Aram Cikgu, enggau meda urang Matah ka Lidi A" Ko ia. Apai aku bebengap. "Nama meh reti Matah ke lidi sida tu?" ko ia ga dalam ati.
Nama deh angkat meh tudah Apai nitih ke Aya A tu ngagai bilik sida A. Peda ia urang sigi maioh nyau tusut sebelah bilik. Ia ke meda sebelah empelua nunga ke ruai kenya meh. Nyau bepaut-paut sida ka meda. Apai aku alu berasai enda nyamai ati.
Maia ia tama ke bilik sida A dia apai aku berasai amai tekenyit ati! Nemu kita bedau parai Si A tu tadi tang munyi ko utai ia ga raya sakit agi jejengap meh tudah. "Apu... salah amai pengawa tu." ko Apai bejako kediri.
"Apai Sanu, maioh amai urang, enda aku enggau tama deh , nyamai nganti ba ruai deh" ko Apai. Nasit ko ia Aya A enda mansal ia enggau meda.
Nemu kita keni sida Matah ke lidi? Ko aku munoh mensia meh nya.
Semua sida kaban belayan ngelingi penindok indu tu alu siko ari Aya sida megai bantal. Nyadi sekumbang ia ke sakit sigi ba bilik besai meh urang ngali ke ia. Ta ditekup ka Aya ia meh moa indu tu enggau bantal! Apai laban ka sigi urang siru enggai meda. Tambah mega ia sigi urang penakut serta takut ke ulah sida A serumah tu.
Nyau Apai mai 'Apai Sekula' sida ia mulai ke diri. "Pulai tua Sanu. Salah pengawa sida serumah tu. Tua kerja perintah, enti bisi urang betusi aku enggai nyadi saksi, tua pan tau di buai kerja. Tua tu nyau enggau urang bebunuh ke mensia ukai nyenggai mensia" ko Apai. Nyau meh seduai mulai ke diri.
Nyadi kenu ke jerita sida ke meda, sigi kasih meda tudah A. Maia sida ke mejal ia enggau bantal ngelingkang meh tudah tuai. Ia ga agi kering serta agi ngeleda deh tudah tuai. Lama ko sida bisi seminit endur ia apus seput. Enda kasih kita ninga jerita tu?
Amai 'scary' wai. Nyadi tudah Apai enda nemu reti nadai meh ia nemu reti 'Matah ka Lidi' tu. Dikumbai ia sigi ngesah urang nadai meh. Nya ko Apai enti bisi urang bepadah nyebut 'Matah ke lidi' agi ia sigi enggai enggau ko ia. Sinu ngenang urang ka sakit raya di gaga bakanya.
Nyadi ko sida A serumah, A tu udah lama sakit raya. Ukai ta sebulan dua nyau ka manggai betaun. Kitai bela nemu meh sakit kanser tu. Tambah enggau ia sigi enda berubat. Udah berapa kali ia dikemegau ka sida serumah kumbai udah nadai agi ga seput ia bisi. Nya meh nyau pemuas ia dipejal (bunuh) sida sekali. Tang urang ke ngereja ka ia nya sigi sida sebilik empu ukai urang bukai.
Apu... ko aku. Parai kitai wai. Nama penyadi enti kitai ba situasi tu. Sigi takut aku. Kasih amai tudah indu nya. Sampai ati Apai Indai ia meda ia di gaga bakanya. Sigi lelak, buntau, pedis meh ngembuan urang sakit, tang anang sampai ngaga ia bakanya. Indah enti urang sakit enda tau makai ngirup kitai udah sinu meda. Enda nemu meh kitai penemu setiap mensia sigi enda sama.
8 comments:
amat baru ia aku nemu cerita pasal 'matah ke lidi' tu di menua kitai. lembut pala patung serta sinu ati ke tudah ke digaga sida serumah bakanya. kati nya, indu nya bisi madah ke sida sekaban ia enggai idup agi, wai?
ba jaku ribai enti ia ke sakit nya minta diri enggai diidup ke agi laban endang nadai jalai agi kena ngidup ke tudah, baik ia cara lutur tauka enggau 'belian' ka kitai, kumbai urang 'euthanasia'.
tang enggau jalai ke 'sah' baka dicucuk lutur enggau ubat(racun) di spital tauka klinik disaksi ke sekeda sida sebilik ke ka datai maya nya enggau pulis agi. tang ukai semua spital di dunya tu tau ngereja ia, di menua europe tu, menua Belgium enggau Switzerland aja ngesah ke pengawa euthanasia tu.
di menua peranchis tu, barang sapa urang tauka lutur ngereja pengawa tu nadai pemendar ari perintah tau diukum jail 10 taun.
Aku pen tekenyit ninga kitai Iban bisi pengawa dikumbai "matah ka lidi". Amat sinu amat enti bedau maya iya mati diasoh mati. Enti nya cancer lama laun mati ga iya. Anang kitai ngaga kaban kitai baka nya, kira ka ngapus ka nyawa iya sebedau maya iya patut mupok ka sebayan.
Kawan aku siko maya iya pansut ari spital laban ka sakit cancer, alu nadai utai ulih dikerja agi lutur laban penyakit iya nyau advanced, iya empu enggai ngirup enggau makai. Iya ninggal dua minggu udah iya ka enggai nerima pemakai enggau ai irup.
apu!
tekenyit ku macha post nuan nya. sinu ngenang tudah ke digaga bala kaban bakanya. Iga gak nyau bakanya ngaga tudah. Indah jelu pen enda kempang munuh anak ia, tu ukai jelu agi, nyau nyadi antu kini...
ces....
Lyana- nya meh mensia enda sama. Pelaba aku nadai indu nya meri pemendar ngagai sida munuh ia deh.
Puteri-Ko sida indu nya sigi enda kala berubat. Sinu meh ninga cerita ia. Ia ka enda tan ati ninga maia sida nyebut ia ngelingkang maia moa ia titekup bantal.
Chris- Sigi sinu cerita tu. Mayoh deh cerita nyelai aku. Ila bisi ari nusi ka bala maioh.
tak naka-naka meh pengawa bansa nya neh. Enda tau ditampung adat nya. enda aku kala ninga bisi adat matah ke lidi tu, baru meh tu. akaiiiiii ukai mina lembut pala patung aku ninga tu nyu getar2 asai ati akaidaiiii
Nya meh Andan, amat munyi ko dek. Enda tau titih adat tu.
doyee..
bisi ku nanya apai ku, amat bisi pengawa 'matah ke lidi' nya ko apai ku. Tang nya pengawa maya kelia menya la..sinu meda tudah merinsa kenu..tang apai aku nadai kala ninga/meda pengawa tu nyadi amat2 di menua.
Chris nya meh. Enda semua bansa Iban ngembuan adat tu. Enti ba menua kami nadai kala ninga. Nya meh kebuah apai aku enda nemu. Semadi udah meda urang ngereja ka 'adat' tu baru ia nemu.
Post a Comment