Apu.. lama enda ngabas sida ruai. Nyin aku tembu bejegau sebelah fb. Bisi cerita ka enggau bala maioh bekunsi.
Empai lama aku meda siti filem pasal health care ba siti -siti menua. Nama filem tu SICKO. Nyadi aku rindu endar meda hos programe tu Micheal Moore. Nyadi ia asal ari US tang ia balat endar bejai perintah ba menua US setegal maioh amai karenah pasal pengerai. Munyi ko tag line filem tu This Might Hurt A Little.
Nyadi filem tu ia bisi ngaga kajian ba US empu, udahnya ba Canada, France ,UK enggau Cuba. Aku pen tekenyit meda nama utai udah di pansik ia. Bisi endar ga utai ke di bantai ke ia nya ngasoh ati aku alit, ngasoh aku sinu, serta ngasoh ati aku geram.
Aku enda kala ke menua tasik munyi ko sida indai. Nya aku enda nemu kati gaya rumah sepital urang din. Kati gaya sida meri ubat. Kelia maia aku darjah 6 aku kala meda siti cerita Hindi (musim minat Hindustan). Apai hero sakit, biasa aa hero mesti urang merinsa, heroin mesti urang kaya. Dr ngubat apai ia udah nya ia nulis prescription ba kertas alu asoh ia hero tadi meli ba pharmacy ubat. Iran ati aku maia nya nama dr nya ngasuh ia meli ke diri empu. Nama hero nya enda ngambi ubat ba kaunter ubat ba sepital nya empu. Runding nembiak umur 12 tahun nama utai temu. Diatu baru aku nemu kebuah ia.
Aku ukai urang US aku enda nemu amai kati health care system sida din. Pelaba ka aku Puteri mesti nemu. Ukai ka bejai or ukai ka judge health care ba siti-siti menua tang aku sengaja ka bekunsi ke cerita tu. Enti nitih ka Micheal ia sigi enda setuju enggau system ba US. Nama kabuah laban sida amai begantung ba insurance policy. Enti dek nadai insurance, dek enda ulih berubat (enda ulih di ubat enggau manah). Bisi siti kes lelaki tu kena kepit mesin ba jari ia. Kasih endar kena dua dua piak jari ia. Kanan enggau kiba. Maia ia di anjung ke sepital ia madah ke diri nadai insurance. Udahnya nurse nanya ia sigi ni jari ka di selamat ke ia? Kanan tauka kiba. Sepital mina ulih ngubat salah siti jari aja laban ia nadai insurance. Apu...parai kitai. Pecuma amai enti kenya. Siti kes baby kena sakit angat. Laban ke nadai insurance sida enda ulih ngubat baby tu enggau lengkas.
Siti cerita ke sinu amai. Cerita urang merinsa tisi jalai sakit. Ia dibai ke sepital besai tang sepital enggai ngubat ia. Alu di anjung sida sepital ngena teksi ke rumah charity. Ukai cerita di gaga laban bisi cctv ngerakam gambar ini tuai tu. Kasih endar agi ngena baju sepital tudah. Ko urang ke jaga rumah charity nya sigi maioh kes sida sepital ninggal ke pesakit merinsa ba rumah kebajikan tu. Maia tu aku berasai beterima kasih amai ngagai perintah Malaysia. Enti enda pia kasih tudah sida aki ini sebelah rumah panjai din. Sigi nadai mimpi sida ka berubat.
Tang kitai meda siti ba US. Negara sida maju, facility ba hospital sida canggih, selesa baka private hospital ba Malaysia. Jauh manah agi mega. Aku enda ulih nyalah ke sapa-sapa kitai enda nemu nama plan gov US. Engka sida invest ngagai utai bukai ba rakyat sida. Pelaba ke aku kaban ke diau sebelah US din ulih meri komen pasal utai tu. Siti utai ke ditanya kati sida perintah ulih ngubat bala ke merinsa tudah ke enda mampu meli insurance.
Au, ngagai menua France kitai di bai Micheal. Apu.. kelalu ga pemanah-manah menua tu ari segi health care sida. Barang sapa ke udah beranak sigi bisi siko helper diberi free. Nulong maia lebuh ke baru beranak. Ukai sida mayar helper tu tang perintah! Urang ke nulung tu sigi ngaga nama aja utai di asuh indai ke baru beranak. Buan baby, masu gari, ngemas rumah, berapi ke indai nya meh. Nadai bayar! Pecaya kita? Ka nanya Lyana ga aku. Amai kini. Engka Micheal Moore tu kelalu ka bejai sistem ba US nyau kelalu ia ngelagu utai ba France. Sepital ba France baka enggi kitai ba Malaysia nadai bayar. Nyema bisi seringgit dua meh baka sepital Malaysia meh.
Bisi sekeda sida nyaut, ukai nama perintah menua France ulih nyedia ke semua nya laban rakyat ia mayar tax tinggi? Bah amai ke nya Lyana?
Udah nya di bai Micheal ngagai UK. Din bisi National Helath Service. Bisi sepital enda bebayar. Tudah ke nadai sen udah beranak pan di tambang ke sepital pulai. Siti utai ngasuh ati aku alit, ba sepital tu nadai kaunter bebayar. Bisi kaunter duit tang nya kaunter kena sida patient ngambi duit, baik ke tambang pulai tauka ke pocket money. Nya tu sebengkah. Tu aku ka nanya Indu dara Flo ke diau ba Aberdeen din. Amai nya kini? Tudah Micheal ke interview sida nyau di ketawa ke urang laban nanya berapa sida bebayar ba Health Service tu.
Utai mai aku berunding mega sida ka enggau nulung urang tusah lebuh Sept 11 suba. Maioh sida volunteer sakit laban bisi nyium abuk ke penyakit bukai. Sida nadai entu di tulung perintah ko kenu. Bai Micheal ngagai Cuba sida. Maioh kitai berunding Cuba tu negara mundur, maioh penjenayah tang Micheal mai sida berubat dia laban ubat dia mudah lalu service hospital free. Bisi sida mai ubat asal sida lalu meli ba pharmacy Cuba. Enti di US ubat yang sama sebutul rega semak USD200++ tang ba Cuba ka USD 2 aja! Tekenyit amai sida. Tang kitai enda nemu ga negara mundur kada enda ubat tiruan deh. Bisi ga aku suba tepeda ke documentary pasal fake. Ukai mina beg LV aja di tiru urang wai ubat pan kenya! Kenu ngasuh gerai nemu nambah ke penyakit. Pedis isi!
Last ia wai Micheal madah siti aja perintah US meri service free ba rakyat. Tang kitai mesti tama kia dulu. Berani kita? Prison Guantanamo. Complete ubat dia. Nyentuk ke alai endur beputung (operation room) pan canggih. Dr sedia ada.
Bah kati runding bala maioh. Enti amai utai ko Micheal, amai kasih bala ka nadai duit diau din. Enti batuk ngengapa tak meli sebelah pharmacy aja meh. Anak ke kasih enti lebuh maia tabin. Amai munyi ko indai, ia kala meli ubat darah tinggi ia ba pharmacy sekutak semak RM 50 rega ia. ba sepital sekutak free beri urang wai.
Minta bala kaban blog ke diau sebelah menua urang tau bekunsi runding ba cerita aku sekalitu. Ukai ka bejai menua urang tang ka bekunsi penemu, runding enggau bala maioh. Nya aja cerita sekali tu. Mupok aku.
